Москва ва Токио атом энергияси соҳасида ҳамкорлик бўйича меморандумни имзолади

Россия ва Япония атом энергиясидан тинч мақсадларда фойдаланиш тўғрисидаги меморандумни имзолади. Бу ҳақда «ТАСС» хабар бермоқда. 

Ҳужжат Россия президенти Владимир Путин ва Япония бош вазири Синдзо Абэ иштирокида Росатом, Япония иқтисодиёт, савдо ва саноат ҳамда таълим, маданият, спорт, фан ва технологиялар вазирликлари томонидан имзоланди.

Россия давлат корпорацияси маълумотига кўра, ҳамкорлик кўзда тутилаётган асосий йўналишлардан бири «Фукусима» АЭС аварияси оқибатларини бартараф этишдан иборат. Шунингдек, томонлар Япония ва Россияни тинч атом бўйича ҳамкорлик доирасида боғлайдиган ягона платформани яратиш, ходимлар алмашиш, икки мамлакат инновацион ядро технологияларидан ўзаро фойдаланиш имкониятларини кўриб чиқмоқда.

Олдинроқ Россия ва Япония «Фукусима» АЭСга қарашли уч реакторнинг ишлаб чиққан ядро ёқилғисини олиб кетиш ва қайта ишлаш масаласини муҳокама қилаётгани билдирилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.