Moskva va Tokio atom energiyasi sohasida hamkorlik bo‘yicha memorandumni imzoladi

Rossiya va Yaponiya atom energiyasidan tinch maqsadlarda foydalanish to‘g‘risidagi memorandumni imzoladi. Bu haqda “TASS” xabar bermoqda. 

Hujjat Rossiya prezidenti Vladimir Putin va Yaponiya bosh vaziri Sindzo Abe ishtirokida Rosatom, Yaponiya iqtisodiyot, savdo va sanoat hamda ta’lim, madaniyat, sport, fan va texnologiyalar vazirliklari tomonidan imzolandi.

Rossiya davlat korporatsiyasi ma’lumotiga ko‘ra, hamkorlik ko‘zda tutilayotgan asosiy yo‘nalishlardan biri “Fukusima” AES avariyasi oqibatlarini bartaraf etishdan iborat. Shuningdek, tomonlar Yaponiya va Rossiyani tinch atom bo‘yicha hamkorlik doirasida bog‘laydigan yagona platformani yaratish, xodimlar almashish, ikki mamlakat innovatsion yadro texnologiyalaridan o‘zaro foydalanish imkoniyatlarini ko‘rib chiqmoqda.

Oldinroq Rossiya va Yaponiya “Fukusima” AESga qarashli uch reaktorning ishlab chiqqan yadro yoqilg‘isini olib ketish va qayta ishlash masalasini muhokama qilayotgani bildirilgandi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.