АҚШ президенти Барак Обама сайловларга таъсир ўтказишга уринишнинг жавоби ҳам борлигини ва бу ҳақда у Россия етакчиси Владимир Путинни огоҳлантирганини айтди, деб ёзади Meduza.
«Ҳар қандай хорижий ҳукумат бизнинг сайловларга таъсир ўтказишга уринган пайтда, биз ҳаракат қилишимиз керак. Ва биз ўзимиз зарур деб топган пайтда ва жойда ҳаракат қиламиз ҳам. Жавоб яққол ва омма олдида бўлиши мумкин, бундай бўлмаслиги ҳам мумкин», — деди Обама.
Обаманинг миллий хавфсизлик бўйича ўринбосари Бен Родс Россия ва Америка етакчиси сайловолди хакерлик ҳужумлари борасида сентябрда Ханчжоуда бўлиб ўтган G20 саммитида суҳбатлашганини маълум қилди.
Аввалроқ Оқ уй президент сайловлари чоғида АҚШ Демократик партияси вакилларига уюштирилган хакерлик ҳужумига Путиннинг шахсан ўзи рухсат берганлиги ҳақидаги тахминни қўллаб-қувватлаган эди.
Марказий разведка бошқармаси версиясига кўра, ушбу ҳужумлардан мақсад Ҳиллари Клинтон номзодини дискредитация қилишдан иборат бўлган, бу эса республикачи Дональд Трампнинг ғалаба қозониш имкониятини оширган.
Россия эса хакерлик ҳужумларига алоқадорлигини рад этди.
Изоҳ (0)