Руперт Мёрдок медиахолдинги Sky телекомпаниясининг қолган акцияларини сотиб олиш учун салкам 15 млрд доллар таклиф этмоқда

21st Century Fox Британиянинг Sky телекомпанияси раҳбарияти билан қолган улушларни сотиб олиш ҳақида келишиб олганини маълум қилди. Ҳозирда медиахолдинг телекомпаниянинг 39,1 фоиз акциясига эгалик қилади, дея хабар бермоқда «РБК». 

Компаниянинг ҳар бир акцияси учун Руперт Мёрдок асосчиси бўлган холдинг 10,75 фунт стерлинг таклиф этмоқда, бу мазкур қимматли қоғозларнинг Лондон биржаси савдоларидаги нархидан 40 фоизга ошиқ. 

Шу тариқа Sky умумий қиймати тахминан 18,5 миллиард фунт стерлингга баҳоланмоқда.

Қолган акцияларни сотиб олиш 21st Century Fox учун 11,7 миллиард фунт стерлинг ёки 14,8 миллиард долларга тушиши мумкин. Акциядорлар ва назорат этувчи идоралар маъқуллаган тақдирда келишувни 2017 йил охиригача ёпиш мўлжалланмоқда.

Маълумот учун, Sky Европа медиа-бозори етакчиларидан бўлиб, Буюк Британия, Италия, Германия, Австрия ва Ирландиядаги мижозлари сони 22 миллион кишидан, йиллик тушуми эса 12 миллиард фунт стерлингдан иборат.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.