Янги Зеландия бош вазири Жон Кей истеъфога чиқди

Янги Зеландия бош вазири Жон Кей 5 декабрь, душанба куни кутилмаганда истеъфога чиқишини маълум қилди. Бу ҳақда Reuters агентлиги маълум қилмоқда.

Кейнинг сўзларига қараганда, у лавозимини оилавий шароити туфайли тарк этган. Сиёсатчи журналистларга яқин келажак учун режалари йўқлиги, бироқ парламентни тарк этмаслигини маълум қилди.

Валюта айирбошлаш операциялари бўйича мутахассис бўлган Кей, бунгача молиявий муассасаларда, жумладан, Merrill Lynch’да фаолият юритган. 2008 йилда унинг Миллий партияси сайловларда ғалаба қозонган эди.

Партиянинг янги етакчиси ва бош вазир ҳақидаги қарор Миллий партиянинг 12 декабрь куни бўлиб ўтадиган ёпиқ мажлисида қабул қилинади. Кей ўзининг ўринбосари ва молия вазири Билл Инглиш номзодини қўллаб-қувватлашини маълум қилди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.