Россия иқтисодий ривожланиш вазири, 2 миллион долларлик порахўрликда айбланиб ҳибсга олинган Алексей Улюкаев икки ойга уй қамоғига маҳкум этилди, деб ёзади «РБК» Москванинг Басман тумани суди қарорига таяниб.
Судья Артур Карповнинг қарорига кўра, вазир Москвадаги хонадонидан терговчининг рухсатисиз чиқиб кета олмайди, шунингдек, алоқа воситаларидан фойдалана олмайди. У билан фақат яқин қариндошлари мулоқот қила олади.
Суд мажлиси чоғида терговчи Роман Нестеров Улюкаевнинг жиноятга алоқадорлиги исботланганини айтди. Унинг сўзларига кўра, 2 миллион долларлик пора Улюкаев ўз вазирлик ваколатлари доирасида амалга ошириши керак бўлган ҳаракатлар учун олинган.
Аввалроқ Алексей Улюкаев унга чеклаш чораси сифатида четга чиқишни тақиқлашни сўраган, негаки у 84 ва 85 ёшли ота-онасига ғамхўрлик қилиши лозимлигини айтган эди. Улюкаев, шунингдек, тергов билан максимал даражада ҳамкорлик қилиш ниятини билдирди.
Изоҳ (0)