«Qalampir.uz» нашри Ўзбекистон халқ шоири, Ўзбекистон Қаҳрамони, Ўзбекистон давлат мадҳияси муаллифи «Абдулла Орипов асли Қашқадарёдан. Унинг Қашқадарёга эмас, Тошкентдаги ‘Чиғатой’ қабристонига дафн этилиши сабаби нима?» каби саволларга жавоб топиш мақсадида шоирнинг қизи Юлдуз Орипова билан боғланди.
«Барча-барчага билдирган таъзиялари, қилган дуолари учун ташаккур. Мен шундай инсоннинг фарзанди эканимдан жуда бахтиёрман. Ҳа, айни вақтда қалбимиздаги оғриқ, бўшлиқнинг чеки йўқ, аммо отам ҳақларидаги барча саволларингизга жавоб бера оламан», — деди Юлдуз Орипова.
«Отамни даволанишга жўнатар эканмиз, уларнинг ҳаётдан кўз юмишлари хаёлимизга ҳам келмаганди. Ҳаммаси кутилмаганда содир бўлди... Падари бузрукворимиз вафот этганларидан сўнг, уларни қаерга дафн этиш борасида катталар, амакиларим, оиламиз, биз фарзандлари, қавму-қариндош, жуда кўп ўйладик. Маслаҳатлашган ҳолда уларни Тошкентдаги ‘Чиғатой’ қабристонига, устозлари Ғафур Ғулом, сафдошлари Жуманиёз Жабборов, Эркин Воҳидовларнинг ёнига дафн этишга қарор қилдик», — дейди шоирнинг қизи.
«Тўғри, улар бизнинг отамиз, аммо фақатгина ўзимизни ўйлаб, уларни Қашқадарёга дафн эта олмасдик. Отамизни ижод аҳли, халқ жуда хурмат қилади. Зиёратга борувчиларни қийнаб қўймаслик учун ҳам шундай қарорга келдик. Ҳамма ҳам исталган маҳал Қашқадарёга бора олмайди. Олис йўл, топиш ҳам мушкул бўлади. Бундан ташқари, биз оиламиз билан Тошкентда яшаймиз. Отамизнинг ёнимизда, яқинимизда бўлишларини истадик», — дейди Юлдуз Орипова.
Ўзбекистон халқ шоири Абдулла Орипов сентябрь ойида даволаниш учун АҚШга жўнаб кетгани ҳақида хабар берилган эди. 5 ноябрь куни Абдулла Орипов давомли хасталикдан сўнг АҚШнинг Техас штатида вафот этгани маълум бўлди. Шоир 10 ноябрь куни Тошкентдаги «Чиғатой» қабристонига дафн этилди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)