Ўзбекистон Республикаси Президенти вазифасини бажарувчи Шавкат Мирзиёев Сооронбай Жээнбековни Қирғизистон бош вазири этиб тайинлангани билан табриклади. Бу ҳақда Қирғизистон ҳукумати аппарати маълум қилди, дея билдирмоқда «Кабар».
«Қирғизистон Республикаси бош вазири лавозимига тайинланганингиз билан самимий табрикларимни қабул қилинг. Сизнинг ушбу юксак лавозимдаги фаолиятингиз бундан кейин ҳам ўзбек—қирғиз муносабатларини янада ривожлантириш ва мустаҳкамлашга хизмат қилишига ишончим комил. Икки томонлама алоқаларда ижобий силжишлар кузатилаётганини алоҳида таъкидлаб ўтмоқчиман. Бунга Қирғизистон делегациясининг Андижонга ва Ўзбекистон делегациясини Ўшга амалга оширган ташрифлари яққол мисол бўла олади. Айни пайтда, ўзбек—қирғиз давлат чегараси бўйича олиб борилаётган ишчанлик руҳидаги музокаралар жараёни кўтаринки кайфият бағишламоқда», — дейилади табрикда.
Шавкат Мирзиёев Сооронбай Жээнбековга мустаҳкам соғлиқ, фаолиятида омад, Қирғизистоннинг биродар халқига эса тинчлик-омонлик, гуллаб-яшнаши ва тараққий этишини тилади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)