Ҳотамжон Кетмонов Самарқанддаги учрашувда суд қарорлари ижроси сифатини ошириш бўйича чора-тадбирлар ишлаб чиқишга чақирди

Ўзбекистон Республикаси президентлигига ЎзХДПдан кўрсатилган номзод Ҳотамжон Кетмонов 14 ноябрь, душанба куни Самарқанд вилояти сайловчилари билан учрашди. Вилоят ҳокимлигининг мажлислар залида онлайн видео-конференция шаклида ташкил этилган учрашувда барча туманлардаги сайловчилар бевосита иштирокчи бўлди. Бу ҳақда «Дарё»га партия матбуот хизмати хабар бермоқда.

Тадбирни Олий Мажлис Қонунчилик палатаси депутати Абдуғаффор Қирғизбоев очди ва олиб борди. Номзоднинг ишончли вакили, Олий Мажлис Қонунчилик палатаси депутати Саҳобиддин Арзиқулов Ҳотамжон Кетмоновнинг таржимаи ҳоли билан йиғилганларни таништирди. Шундан сўнг сўз Ўзбекистон Республикаси Президентлигига номзодга берилди.

Ҳотамжон Кетмонов сайловолди дастури билан йиғилганларни таништирди. Хусусан, ижтимоий аҳамиятга молик товарлар ва хизматлар нархини шакллантириш устидан давлат ва жамоатчилик назорати самарадорлигини янада ошириш орқали нархлар ва тарифларнинг ўсиши инфляция даражасидан юқори бўлмаслигини таъминлаш, давлат мулкини хусусийлаштиришдан олинадиган маблағнинг бир қисмини турар-жой фондини шакллантиришга йўналтириш механизмини такомиллаштириш масалаларига эътиборни кучайтириш ҳақида тўхталди.

Шунингдек, автотранспорт воситалари кўпайиб бораётганлиги натижасида йўллар, катта шаҳарлар кўчаларида тирбандликлар вужудга келишига барҳам бериш мақсадида тегишли инфратузилмани доимий такомиллаштириб бориш, пиёдалар йўлакларини капитал таъмирлаш, экологик тоза, соғлом турмуш тарзига замин яратувчи велойўлакларни қуриш зарурлигини таъкидлади.

Жамиятнинг барча аъзоларининг ишончли ижтимоий кафолатлари таъминланиши масалаларида бизнес масъулиятини ошириш лозимлиги, бу вазифани рўёбга чиқаришда «Кучли ижтимоий ҳимоя – асосий мақсадимиз!» шиорига таянилиши ҳақида сўз борди.

Шундан сўнг маъруза юзасидан бир қатор иштирокчилар сўзга чиқди. Улар ўз чиқишларида номзод дастурида илгари сурилаётган инклюзив таълим тизимини янада ривожлантириш ва соҳа ўқитувчиларига имтиёзлар бериш, жисмоний имконияти чекланган талабаларнинг олий ўқув юртларида таълим олиш имкониятларини янада кенгайтириш, педагогик маълумотга эга, лекин бола тарбияси билан машғул бўлгани боис вақтинча ишламайдиган аёлларнинг оилавий мактабгача таълим тарбиячиси сифатидаги уй меҳнатини ташкил этишнинг қонуний асосларини яратиш масалаларини қўллаб-қувватлади.

Номзод сайловолди дастурида суд қарорлари ижроси сифатини ошириш бўйича чора-тадбирлар ишлаб чиқиш, судларда ишларни кўриб чиқиш жараёнига ахборот-коммуникация технологияларини кенг татбиқ этиш, фуқароларнинг судга мурожаат қилиши ва суд ҳужжатларини олишининг электрон тизимини кенг жорий қилиш бўйича билдирган таклифларини ижобий баҳолади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.