2016-yilning 16—21-oktyabr kunlari Oʻzbekiston Respublikasi vakillari elektron davlat xizmatlari koʻrsatish tartibini takomillashtirish sohasida Latviya tajribasini oʻrganish uchun Latviya Respublikasiga oʻquv-tanishtirish tashrifini amalga oshirdi. Bu haqda O‘zbekistondagi BMT Taraqqiyot dasturi matbuot xizmati xabar berdi. Tashrif tashkilotchilari: BMTTDning “Elektron hukumatni rivojlantirish orqali davlat xizmatlari sifatini oshirish” loyihasi va Latviya Tashqi ishlar vazirligi.
O‘zbekiston delegatsiyasi Axborot texnologiyalari va kommunikatsiyalarini rivojlantirish vazirligi, Moliya vazirligi, Ichki ishlar vazirligi, Savdo-sanoat palatasi, Toshkent shahar hokimiyati hamda BMTTD loyihasi mutaxassislaridan iborat edi.
Tashrifning asosiy maqsadi Latviya davlat organlari bilan elektron xizmatlarni rivojlantirishga oid tajriba almashish, jumladan, davlat organlarining ichki jarayonlari faoliyati (back office), davlat xizmatlarini koʻrsatish tartib-taomillari reinjiniringi boʻyicha ilgʻor tajribasini oʻrganish, shuningdek elektron davlat xizmatlarini koʻrsatish bilan bogʻliq boshqa masalalarni o‘rganishdan iborat bo‘ldi.
Tashrif davomida oʻzbekistonlik vakillar Latviyaning ushbu sohadagi asosiy davlat idoralari, jumladan, Atrof-muhitni himoyalash va hududlarni rivojlantirish vazirligi, Moliya vazirligi, Fan va ta’lim vazirligi, Adliya vazirligi, Fuqarolik va migratsiya masalalari boʻyicha departament, Daromadlar bo‘yicha davlat xizmati, Riga shahri Axborot texnologiyalari namoyishi markazi bilan tanishib, Latviya elektron hukumati arxitekturasi hamda elektron davlat xizmatlarini taqdim etish amaliyoti bilan tanishish imkoniyatiga ega boʻldi.
Shuningdek, ishtirokchilarga Latviya elektron hukumatining strategiyasi namoyish etilib, xizmatlarni elektron shaklga oʻtkazish bilan bogʻliq muammolar, ularni hal etishga oid chora-tadbirlar va olingan saboqlar muhokama qilindi.
Noyabr oyida Toshkentda oʻquv safariga bag‘ishlangan seminar tashkil etilib, u yerda safar ishtirokchilari elektron xizmatlarni rivojlantirish boʻyicha Latviya tajribasi haqida olgan bilimlarini boshqa davlat idoralari va OAV vakillari uchun taqdim etadi.
Izoh (0)