Ўзбекистон Республикаси Президенти сайловини ёритиш бўйича Республика матбуот марказида 1 ноябрь, сешанба куни видеоконференцалоқа шаклида жойларда участка сайлов комиссиялари аъзолари учун ҳудудий семинар-тренинглар ташкил этиш масалаларига бағишланган экспертлар гуруҳларининг йиғилиши ўтказилди. Бу ҳақда матбуот маркази хабар бермоқда.
Тадбирда Марказий, округ сайлов комиссиялари аъзолари, депутатлар, сайлов ҳуқуқи бўйича олим ва мутахассислар, фуқаролик жамияти институтлари ҳамда ОАВ вакиллари иштирок этди.
Марказий сайлов комиссиясининг 13 октябрдаги қарори билан Ўзбекистон Республикаси Президенти сайловини ўтказувчи участка сайлов комиссиялари фаолиятини самарали ташкил қилиш масалаларига бағишланган тадбирлар режаси қабул қилинганди. Ушбу режа асосида 20 октябрь куни республика семинар-тренинги ўтказилди.
1—10 ноябрь кунлари Қорақалпоғистон Республикаси, вилоятлар ва Тошкент шаҳрида Марказий сайлов комиссияси, округ сайлов комиссиялари ва Фуқаролик жамияти шаклланишини мониторинг қилиш мустақил институти томонидан сайлов комиссиялари аъзоларининг ҳуқуқий билимларини янада юксалтириш ҳамда уларнинг сайлов комиссиялари фаолиятини самарали ташкил қилиш бўйича кўникмаларини мустаҳкамлашга қаратилган семинар-тренинглар ташкил этиш белгиланган.
Шу муносабат билан йиғилиш иштирокчилари участка сайлов комиссиялари аъзолари учун ҳудудий семинар-тренингларни уюшқоқлик билан ўтказиш масалаларини атрофлича муҳокама қилди.
Қайд этилганидек, ўтказиладиган тадбирлардан мақсад участка сайлов комиссиялари барча аъзоларини қамраб олган ҳолда комиссия фаолиятининг муҳим жиҳатлари, чунончи, сайлов участкаларини жиҳозлаш, сайловчилар рўйхатини тузиш ва унга ўзгартишлар киритиш, муддатидан олдин овоз беришни ҳамда сайлов куни овоз беришни ташкил қилиш, кузатувчилар институти аҳамияти, ОАВнинг сайлов жараёни очиқлиги ва ошкоралигини таъминлашдаги роли сингари муҳим жиҳатларга алоҳида эътибор қаратишдир.
Сўзга чиққанлар ҳудудий семинар-тренингларни эркин фикр алмашуви, савол-жавоб тарзида ўтказиш юзасидан таклиф ва тавсияларини билдирди.
Изоҳ (0)