Volkswagen унинг машиналарини сотиб олган америкаликлар ва АҚШ маъмуриятига 14,7 млрд доллар тўлайди

«Дизель можароси»ни тартибга солиш бўйича компенсация сифатида Германиянинг Volkswagen компанияси АҚШдаги Volkswagen машиналари эгалари, шунингдек, АҚШ маъмуриятига умумий ҳисобда 14,7 миллиард доллар тўлайди. Бу ҳақда «РБК» хабар бермоқда.

Мазкур сумма Сан-Франциско округ суди томонидан тасдиқланган. The Wall Street Journal’нинг қайд этишича, бу АҚШ тарихида автомобиль ишлаб чиқарувчилар томонидан тўланган энг катта компенсация пулидир.

Volkswagen ўз харидорларига уларнинг машиналарини сотиб олишни ёки уларни АҚШ экология стандартларига мувофиқ равишда компания ҳисобидан таъмирлаб беришни таклиф қилади.

Бундан ташқари, «дизелгейт» доирасида АҚШдаги Volkswagen эгалари ўртача 5,1 минг доллардан 10 минг долларгача қўшимча компенсация пули олади. Суд қарорига кўра, Volkswagen табиатни муҳофаза қилиш жамғармаларига 4,7 миллиард доллар тўлайди.

Volkswagen ўзининг АҚШдаги муаммоли автомобилларини 2016 ноябридан чақиришни бошлаши керак. Агар 2019 йил июнига қадар муаммоли автомобилларнинг 85 фоизи соз ҳолатга келтирилмаса ёки йўллардан олинмаса, Volkswagen’га қўшимча жарима солиниши мумкин.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.