Дунё океани сатҳи сўнгги 23 минг йил ичида Гренландия музликлари эриши ҳисобидангина 4,6 метрга кўтарилди, бу олимларнинг аввалги ҳисоб-китобларидан анча юқори кўрсаткич. Бундай хулосага Копенгаген университети доценти Шфакат Аббос Хон раҳбарлигидаги тадқиқотчилар халқаро гуруҳи келди, деб ёзади «ТАСС».
«Сунъий йўлдош орқали кузатувлар ва аэрофотосъёмка маълумотлари Гренландия музликлари сўнгги 20—100 йил ичида қанчалик даражада чекинганини баҳолаш имконини беради», — деди Хон.
GPS-кузатув маълумотлари Ернинг энг катта ороли муз қатлами эриб бориши билан, аста-секин, аммо қатъийлик билан денгиз тубидан кўтарилаётганини кўрсатди. Гренландия жануби-шарқида кўтарилиш йилига тахминан 12 мм тезликда содир бўлмоқда.
Олимлар яратган компьютер модели сўнгги музлик максимумидан буён Гренландия ўз музларининг қарийб 40 фоизини йўқотганини кўрсатди. Агар оролнинг мавжуд музликларининг барчаси эритилса, Дунё океани сатҳи яна 7,5 метрга кўтарилади.
БМТ томонидан таъсис этилган Иқлим ўзгариши бўйича ҳукуматлараро экспертлар гуруҳи ҳисоб-китобларига кўра, Дунё океани сатҳи аср охирига келиб, бир метрга кўтарилиши мумкин.
Изоҳ (0)