Mitsubishi’нинг йўловчи самолёти АҚШга синов парвозини муваффақиятли амалга оширди

Mitsubishi компаниясининг йўловчи ташувчи реактив самолёти Япониянинг Нагоя шаҳридан АҚШнинг Вашингтон штатига биринчи муваффақиятли синов парвозини якунлади. Бунгача ҳаво совутиш тизимидаги нуқсонлар сабаб лайнер парвози бир неча бор қолдирилган эди, дея хабар беради «РБК». 

Ҳаво кемаси Вашингтон штатининг Грант округидаги халқаро аэропортга қўнди. Парвоз 68 соат давом этди. Беринг денгизидан Аляскага учиб ўтгунига қадар самолёт Япония шимоли ва Россияда қўнишни амалга оширди. Америка қитъасида лайнер Мозес-Лейкда (Вашингтон штати) ҳам қўшимча тўхтаб ўтди. 

MRJ минтақавий реактив самолёти Япониянинг Mitsubishi Heavy Industries корпорацияси бўлинмаси — Mitsubishi Aircraft томонидан ишлаб чиқилган бўлиб, сўнгги 50 йилдан кўпроқ вақт мобайнида Японияда тайёрланган илк йўловчи ташувчи ҳаво кемаси бўлди. 

Самолётнинг ўртача учиш масофаси 1,8 мингдан 3,7 минг километргачани ташкил этади. Тақдимоти ўтган йил октябрида ўтказилган лайнернинг 78 ва 92 йўловчи ўрнига эга модификациялари бўлиб, компания 100 кишига мўлжалланган самолётларни ҳам ишлаб чиқариш имкониятини кўриб чиқмоқда.

Ҳозиргача Япония ва АҚШ компанияларидан 477 та самолётга буюртма олинган. Самолётларни 2018 йилдан эгаларига етказиб беришни бошлаш режалаштирилган.