Эрон ҳарбий-денгиз кучлари НАТО аъзоси бўлган давлат кемаси билан илк бор қўшма машғулотлар ўтказди

Форс кўрфази ва Ормуз бўғози акваториясида Эрон ва Италия ҳарбий-денгиз машғулотлари бўлиб ўтди. Бу ҳақда Эрон ҳарбий-денгиз кучларининг биринчи ҳарбий-денгиз ҳудуди қўмондони, адмирал Ҳусайн Озод маълум қилди, дея хабар бермоқда «ТАСС».

Машғулотларда Эрон томонидан «Алванд» ва «Алборс» эсминецлари, Италиядан «Эуро» фрегати, икки тарафдан ҳам биттадан вертолёт иштирок этган.

«Италия билан биргаликдаги машқлар жанговар тайёргарликни ошириш, шунингдек, тажриба ва жанговар малака алмашиш мақсадида ўтказилди», — дея таъкидлади адмирал. 

Минтақадаги денгиз қароқчилигига қарши кураш миссияси доирасида бўлиб турган «Эуро» фрегати 24 сентябрь куни дўстона ташриф билан Бандар-Аббос портига кирди.

Хабар беришларича, 15 йилдан бери биринчи бор Италия ҳарбий-денгиз кучлари кемаси Эрон портига келган.