АҚШ махсус хизматларининг қочқиндаги собиқ ходими Эдвард Сноуден Германиянинг Гессен федерал еридаги Кассель шаҳри томонидан ҳар йили топшириладиган Glas der Vernunft (Идрок қадаҳи) мукофоти билан тақдирланди. Бу ҳақда, DPA’га асосланиб, «ТАСС» хабар бермоқда.
«АҚШ махсус хизматларини фош этиш билан Эдвард Сноуден жамоатчиликнинг фуқаролар маълумотларини чекланмаган миқдорда тўплаш ва сақлаш муаммоларига бўлган қизиқишини орттирди. У жасорат ва соф идрок билан ўз ҳаёти ва хавфсизлигини таҳдид остига қўйишга қарор қилди», — дейилади мукофот топширилиши муносабати билан Кассель порталида жойлаштирилган хабарномада.
Мукофотни топширишга бағишланган тантанали маросим 25 сентябрь куни Кассель давлат театри биносида бўлиб ўтди. Мукофот соҳибининг ўзи маросимда қатнаша олмади.
«Қонун виждоннинг ўрнини боса олмайди», — деди Сноуден тақдирлаш маросими учун амалга оширган видеомурожаатида.
Изоҳ (0)