Facebook ва Twitter ижтимоий тармоқларда уйдирма янгиликларга қарши курашиш мақсадида New York Times, Washington Post, BuzzFeed News, AFP, CNN каби 30 дан ортиқ медиакомпаниялар қаторига қўшилди. Бу ҳақда TJournal хабар бермоқда.
Мазкур ижтимоий тармоқлар 2015 йил июнида йўлга қўйилган ва Google ҳам қўллаб-қувватлаган First Draft Coalition лойиҳаси қатнашчиларига айланди.
Лойиҳа муаллифлари компаниялар учун ушбу йўналишда қўлланма ишлаб чиқилиши, ижтимоий тармоқ фойдаланувчилари ўртасида медиасаводхонликни илгари суриш, шунингдек, фойдаланувчилар янгиликларни тасдиқлаши ёки инкор этиши мумкин бўлган платформани ишга туширишларини маълум қилган эди.
Платформа октябрь охирида фаолиятини бошлаши кўзда тутилган.
Икки йирик ижтимоий тармоқнинг лойиҳада иштироки моҳияти ҳозирча бироз мавҳум бўлиб қолмоқда. Facebook ва Twitter сохта янгиликлар тарқатилиши туфайли бир неча бор танқид остига олинган, уларнинг алгоритмлар ёрдамида бунга қарши курашиш чоралари самарасиз якунланган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)