Мустақиллик йилларида эркин, демократик давлат қуриш, бозор иқтисодиётига ўтиш, фуқаролик жамиятини барпо этишда, мамлакатни тараққий топган давлатлар қаторига кўтариш йўлида шошма-шошарлик ва пала-партиш ишларга йўл қўйилмади. Бу ҳақда Президент Ислом Каримовнинг Ўзбекистон халқига мустақилликнинг 25 йиллиги муносабати билан йўллаган байрам табригида айтилди. Табрик матнини ЎзА тақдим этди.
«Биз олдимизга қўйган буюк мақсадларга эришишда — эркин, демократик давлат қуриш, бозор иқтисодиётига ўтиш, фуқаролик жамиятини барпо этишда, мамлакатимизни тараққий топган давлатлар қаторига кўтариш йўлида шошма-шошарлик ва пала-партиш ишларга йўл қўймадик, жаҳондаги илғор тажрибаларни ўрганиб, лекин кимдандир кўр-кўрона нусха олганимиз йўқ. Бу борада чуқур маънога эга бўлган ‘Ислоҳот — ислоҳот учун эмас, аввало инсон учун’ деган ғоя асосида эл-юртимизга хос хусусиятлар, шарт-шароитларга мос бўлган, халқаро майдонда ‘ўзбек модели’ деб тан олинган, узоқни кўзлаган йўлни ўзимизга маъқул топдик ва уни амалга оширишга киришдик», — деб таъкидлади давлат раҳбари.
Изоҳ (0)