«Она юрт» қўшиғи билан танилган Жасур Ризаев Тошкент давлат стоматология институти ректори этиб тайинланди

Ўзбекистон Вазирлар Маҳкамаси қарори билан Жасур Ризаев Тошкент давлат стоматология институти ректори этиб тайинланди. Бу ҳақда «Xushnudbek.uz» хабар берди.

Бунгача Жасур Ризаев Тошкент тиббиёт академияси 3-клиникаси бош шифокори ҳамда Тошкент врачлар малакасини ошириш институтининг 2-стоматология кафедраси мудири лавозимларида ишлаб келаётган эди.

Жасур Ризаев 1996 йил Тошкент давлат тиббиёт институти (ТДТИ)ни тамомлаган. 1998—2000 йилларда катта лаборант, 2000—2007 йилларда ассистент, 2007—2008 йилларда 1-ТДТИда доцент, 2008—2011 йилларда Тошкент шаҳар Учтепа туман тиббиёт бирлашмасида раҳбар бўлиб фаолият юритган.

2011 йилдан буён Тошкент тиббиёт академияси 3-клиникаси бош шифокори, 2016 йилдан эса Тошкент врачлар малакасини ошириш институтининг 2-стоматология кафедраси мудири лавозимларида ишлаган. 2006 йилда тиббиёт фанлари номзодлиги учун, 2016 йили тиббиёт фанлари докторлиги учун диссертацияларни ҳимоя қилган, 60 дан ортиқ илмий ишлар муаллифи.

Қайд этиш жоиз, Жасур Ризаев шифокорлик фаолияти билан бир қаторда қўшиқлар ҳам куйлаган бўлиб, унинг «Она юрт», «Муҳаббат соғинчи», «Дўст» каби композициялари машҳур.

Маълумот учун, бунгача Тошкент давлат стоматология институтига Ниғмон Ҳабилов ректорлик қилаётган эди. У Вазирлар Маҳкамасининг 2014 йил 7 августдаги қарорига мувофиқ институт ректори этиб тайинланган эди.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.