Ўзбекистоннинг ЮНЕСКОдаги доимий вакили Лола Каримова-Тиллаева 31 август, чоршанба куни Ўзбекистон халқига табрик йўллади. Табрик матни Лола Каримова-Тиллаеванинг Instagram’даги расмий саҳифасида эълон қилинган.
«Азиз юртдошлар, сизни барчамиз учун қадрли айём — Ўзбекистоннинг Мустақиллик куни билан чин кўнгилдан муборакбод этаман!», — деб бошланади Лола Каримова-Тиллаеванинг табриги.
«Мен бизнинг бағрикенг, меҳнаткаш ва ниҳоятда иқтидорли халқимизга бахт-саодат ва фаравонлик тилайман! Саҳоватли она заминимизда ҳамиша тинчлик ва хотиржамлик барқарор бўлсин. Она Ватанимизда асрлар оша мавжуд бўлган бағрикенглик, турли миллат ва динлар вакиллари орасидаги ўзаро ҳурмат ва эҳтиромга асосланган муносабатлар ҳамиша сақланиб қолишига тилакдошман», — дейди Лола Каримова-Тиллаева.
«Азизлар, ушбу фурсатдан фойдаланиб, мен барчангизга Президентимизнинг тез шифо топишларини истаб билдирган самимий тилаклар ва эзгу ниятларингиз учун чин қалбимдан ўз миннатдорчилигимни изҳор этмоқчиман. Бу бизлар учун жуда аҳамиятлидир ва ушбу ниҳоятда самимий ва дилдан чиққан тилаклар, сўзлар отамнинг шифо топишларида ёрдам бермоқда, деб ишонаман. Сизларга катта раҳмат, азизлар!», — дейилади Лола Каримова-Тиллаеванинг байрам табригида.
Маълумот учун, Ўзбекистон Вазирлар Маҳкамаси 28 август куни Ўзбекистон Президенти Ислом Каримов стационар даволанишда эканини маълум қилган эди.
Изоҳ (0)