Ўзбекистон миллий терма жамоасининг 24 август кунги рақиби ўзгарди. Режага кўра шу куни Тошкентда Яман терма жамоаси меҳмон бўлиши керак эди.
ЎФФ матбуот хизмати хабарига кўра, Ямандаги Сано аэропортида вазият ёмонлашган ва у ўнгланмагунига қадар футболчилар мамлакат ташқарисига чиқа олмайди. Шу сабабли Яман Футбол Федерацияси бош котиби Ҳамид Аш-Шайбоний вазиятни тўғри тушунишни сўраб, ЎФФга мактуб йўллаган.
1 сентябрь куни Сурия миллий терма жамоасига қарши ЖЧ—2018 саралаши доирасида майдонга тушадиган Ўзбекистон миллий терма жамоаси Яман ўрнига зудлик билан рақиб топди. 24 август куни Тошкентдаги «Бунёдкор» стадионида Африканинг Буркина-Фасо терма жамоаси меҳмон бўлади.
Ўзбекистон миллий терма жамоаси бош мураббий Самвел Бабаян билан йиғинни 20 август куни бошлаши режалаштирилган.
Аввалроқ Ўзбекистон миллий терма жамоаси қора қитъанинг бошқа бир аъзоси Экваториал Гвинея билан ўртоқлик учрашувини бекор қилишга мажбур бўлганди.
Изоҳ (0)