Буюк Британиянинг Thomas Cook Group сайёҳлик фирмаси аёл мижозларидан бирига унинг марҳум турмуш ўртоғи гўёки Испанияга саёҳат қилганини маълум қилди, деб хабар бермоқда Daily Mail. Марҳумнинг хотини Полин Притчард сайёҳлик фирмаси йўл қўйган хато ўта қўпол эканини айтди.
Ушбу воқеа июнь ўрталарида юз берди, аммо матбуот бу ҳақда август бошида хабар топди. Полин, унинг турмуш ўртоғи Жеймс ва уларнинг 12 яшар ўғли 21 май куни Испаниянинг Пальма-де-Мальорка курортида дам олиш учун парвоз қилишни режалаштирганди. Аммо Жеймснинг жигари билан боғлиқ жиддий муаммолар пайдо бўлди ва у 14 май куни вафот этди.
Шундан сўнг, бева қолган аёл сайёҳлик фирмасига Испанияда тўрт юлдузли меҳмонхонани бронь қилиш учун сарфланган пулни қайтариш ҳақида мурожаат қилди. Аввал фирма харажатларни қайтаришга кўнмади, кейин эса рози бўлди.
15 июнь куни Полин Притчард Thomas Cook Group’дан унинг оиласи 21 май куни Пальма-де-Мальоркага борганини, бироқ Испания чегарачилари унинг эри Жеймсни мамлакатга киритмаганини тасдиқловчи электрон хат йўллади. Шу сабабли, компания операторлари меҳмонхонани бронь қилиш учун сарфланган маблағни қайтара олмаслигини маълум қилди.
Хатоликни аниқлаганидан сўнг Thomas Cook Group вакиллари бева аёлдан узр сўради. Бўлиб ўтган воқеа аёлни шокка туширди. Унинг сўзларига кўра, аёл ва унинг турмуш ўртоғи Thomas Cook Group сайёҳлик фирмаси хизматларидан 10 йил фойдаланган ва улар шу кунгача бунчалик камситилмаган эди.
Thomas Cook Group компаниясига 1841 йилда асос солинган бўлиб, у дунёдаги биринчи сайёҳлик фирмаси сифатида қайд этилган.
Изоҳ (0)