Buyuk Britaniyaning Thomas Cook sayyohlik firmasi marhumni sayohatga “jo‘natdi”

Buyuk Britaniyaning Thomas Cook Group sayyohlik firmasi ayol mijozlaridan biriga uning marhum turmush o‘rtog‘i go‘yoki Ispaniyaga sayohat qilganini ma’lum qildi, deb xabar bermoqda Daily Mail. Marhumning xotini Polin Pritchard sayyohlik firmasi yo‘l qo‘ygan xato o‘ta qo‘pol ekanini aytdi.

Ushbu voqea iyun o‘rtalarida yuz berdi, ammo matbuot bu haqda avgust boshida xabar topdi. Polin, uning turmush o‘rtog‘i Jeyms va ularning 12 yashar o‘g‘li 21-may kuni Ispaniyaning Palma-de-Malyorka kurortida dam olish uchun parvoz qilishni rejalashtirgandi. Ammo Jeymsning jigari bilan bog‘liq jiddiy muammolar paydo bo‘ldi va u 14-may kuni vafot etdi.

Shundan so‘ng, beva qolgan ayol sayyohlik firmasiga Ispaniyada to‘rt yulduzli mehmonxonani bron qilish uchun sarflangan pulni qaytarish haqida murojaat qildi. Avval firma xarajatlarni qaytarishga ko‘nmadi, keyin esa rozi bo‘ldi.

15-iyun kuni Polin Pritchard Thomas Cook Group’dan uning oilasi 21-may kuni Palma-de-Malyorkaga borganini, biroq Ispaniya chegarachilari uning eri Jeymsni mamlakatga kiritmaganini tasdiqlovchi elektron xat yo‘lladi. Shu sababli, kompaniya operatorlari mehmonxonani bron qilish uchun sarflangan mablag‘ni qaytara olmasligini ma’lum qildi.

Xatolikni aniqlaganidan so‘ng Thomas Cook Group vakillari beva ayoldan uzr so‘radi. Bo‘lib o‘tgan voqea ayolni shokka tushirdi. Uning so‘zlariga ko‘ra, ayol va uning turmush o‘rtog‘i Thomas Cook Group sayyohlik firmasi xizmatlaridan 10 yil foydalangan va ular shu kungacha bunchalik kamsitilmagan edi.

Thomas Cook Group kompaniyasiga 1841-yilda asos solingan bo‘lib, u dunyodagi birinchi sayyohlik firmasi sifatida qayd etilgan.