АҚШ Россияни Суриядаги ҳужумкорлик операцияларини бас қилишга чақирди
АҚШ Россия ва Сурия ҳукуматини Сурияда ҳужум операцияларини ўтказишдан тийилишга чақирмоқда, бунинг эвазига мухолифатга шу мақсадда таъсир ўтказишни ваъда қилмоқда, деб ёзади «Интерфакс».
«Россиянинг ўзи ҳужум операцияларини ўтказишдан тийилиб, Асад режимини ҳам тийиб туриши ғоятда муҳим эканлиги, бизнинг вазифамиз эса мухолифат бундай операцияларга аралашмаслигига эришишдан иборатлиги тушунарли», — деди АҚШ давлат котиби Жон Керри 1 август, душанба куни. Ушбу баёнотни у Колумбия ташқи ишлар вазири билан музокаралар якуни бўйича матбуот анжуманида берди.
Суриядаги воқеалар ривожини Пентагондагилар ҳам изоҳлади. Улар Америка ҳарбий муассасаси Суриядаги россиялик ҳарбийлар билан ахборот алмашмаётганлиги ва бундан кейин ҳам бундай бўлмаслигини маълум қилди.
