Бразилия федерал суди WhatsApp мобил дастурига эга бўлган Facebook компанияси ҳисобларидаги 38 миллион реални (11,7 миллион доллар) хатлаб қўйиш ҳақида қарор чиқарди. Бу ҳақда «ТАСС» хабар бермоқда.
Ушбу қарорга мессенжер вакилларининг мамлакат ҳуқуқни муҳофаза қилиш органларига баъзи фойдаланувчилар ёзишмаларини қўлга киритиш имконини тақдим этишдан бош тортганлиги сабаб бўлди.
Бразилия судлари WhatsApp’ни бутун мамлакат ҳудудида блоклаб қўйиш ҳақида тўрт марта қарор чиқарди. Бу каби қарорлар ўтган йилнинг февраль ва декабрь, шунингдек, жорий йилнинг май ва июль ойларида қабул қилинган эди.
Улар ҳар сафар телекоммуникациявий компаниялар ва мессенжер эгаларининг апелляцияларидан сўнг бекор қилинган.
Июнь ойи охирида Бразилиянинг Лондрина шаҳри суди Facebook компаниясининг ҳисобларидаги 19,5 миллион реални хатлаб қўйиш ҳақида қарор чиқарди. Бу сумма терговга ёрдам беришни рад этганлиги учун Жанубий Америка мамлакатининг ҳукумати томонидан юклатилган жаримага тенгдир. Ўшанда Бразилия ҳуқуқни муҳофаза қилиш органлари мобил дастурдан фойдаланган гумонланувчиларнинг ёзишмаларини қўлга киритишга уринган.
Изоҳ (0)