Apple акциялари савдолар 15 фоизга пасайгани ҳақидаги хабардан сўнг 8 фоизга кўтарилиб кетди

NASDAQ биржасида Apple компанияси акциялари нархи кескин тарзда ўсди, деб ёзади «РБК».

27 июль куни компания қимматли қоғозлари савдоси 104,25 доллар даражасида очилди, бу ўтган кунги савдолар ёпилиши вақтидагига қараганда, 7,84 фоизга кўпроқ демакдир. Apple акциялари нархи етган максимал қиймат 104,35 долларга тенг бўлди.

Таҳлилчилар котировкаларнинг кескин ўсишини Apple томонидан яқинда эълон қилинган молия йилининг учинчи чораги бўйича ҳисобот билан боғламоқда. Ўтган йилнинг шу даври билан таққослаганда компания кўрсаткичлари ёмонлашди, аммо таҳлилчилар прогнозидан яхшироқ бўлиб чиқди.

Эслатиб ўтамиз, 2016-молия йилининг учинчи чорагида Apple компаниясининг соф фойдаси 27 фоизга камайди. 25 июнь куни тугаган чорак якунларига кўра, соф фойда 7,8 миллиард долларга тенг бўлди. Ўтган молия йилининг худди шу даврида эса ушбу кўрсаткич 10,68 миллиард долларни ташкил қилган. Apple фойдаси битта акция ҳисобида 1,85 доллардан 1,42 долларгача камайди.

Чорак давомида Apple гаджетлари савдоси йиллик ҳисобда 15 фоизга тушиб кетди, бироқ бу натижа ҳам прогнозлардан яхшироқ бўлиб чиқди: 40,02 миллионта ўрнига 40,39 миллионта турли қурилмалар сотилди.