Еврокомиссия ўрта ва оғир юк машиналари ишлаб чиқарувчи беш компанияни Европа рақобат меъёрларини бузганликлари учун Евроиттифоқ тарихидаги энг йирик жаримага тортди. Рақобат бўйича еврокомиссар Маргрете Вестагернинг маълум қилишича, жарима миқдори 3 миллиард еврога тенг. Бу ҳақда «ТАСС» хабар бермоқда.
Жаримага тортилган компаниялар — MAN (Volkswagen’га тегишли), Daimler, Volvo/Renault концерни, шунингдек, Голландиянинг DAF ҳамда Италиянинг Iveco компаниялари.
«Жарима миқдорининг бу қадар катталиги картель жуда кўп вақтдан буён фаолият юритиб келаётгани билан тушунтирилади. У 1997 йилда компания раҳбарларининг Брюсселдаги йиғилишида ташкил этилган. Кейинги йилларда компания раҳбарияти вакиллари мунтазам равишда учрашиб турган, улар нарх сиёсатини, рақобат қонунчилиги бузилишини яшириш услубларини мувофиқлаштирган, ўз моделларида янги технологиялар жорий этишни синхронлаштириб борган», — маълум қилди Вестагер хоним.
Яна бир юк машиналари ишлаб чиқарувчиси — Scania компаниясининг иши кўриб чиқилмоқда, у ҳали жаримага тортилмади.
Изоҳ (0)