АҚШда охирги пайтларда автобошқарувли Tesla машиналари билан боғлиқ учинчи йўл-транспорт ҳодисаси қайд этилди. Бу ҳақда «Интерфакс» хабар бермоқда.
Май ойи бошида Жошуа Браун Флоридада Tesla Model S билан боғлиқ ҳодисада ҳалок бўлди. Ҳозирда расмийлар томонидан мазкур автоҳалокат сабаблари ўрганилмоқда. Июль аввалида Tesla Model X Пенсильванияда ағдарилиб кетди, бу воқеада ҳеч ким жабрланмади. Монтана штатида 10 июль, якшанбага ўтар кечаси содир бўлган учинчи автоҳалокатда ҳам ҳайдовчи ва йўловчи омон қолди. Компания мазкур ҳодиса чоғи автопилот ишлаганини тан олса-да, ундан нотўғри фойдаланилганини даъво қилмоқда.
«Биздаги маълумотлорга кўра, ҳайдовчи қўли руль чамбарагида бўлмаган ва руль ғилдирагига ҳеч қандай босим ўтказилмаган. Бу эса мураккаб шароитларда ҳайдовчи чамбаракни тутиб туриши лозимлигини назарда тутувчи тизимдан фойдаланиш қоидаларига зид ҳисобланади», — деб изоҳ берди компания вакили. Ундан ташқари, автопилот тизими ажратувчи чизиқлар бўлмаган қишлоқ йўллари учун мослашмаган.
Учинчи машина ҳайдовчиси — Пан исмли хитойлик полицияга бошқарув тизими огоҳлантиришларини эшитгани, бироқ инглиз тилини билмагани учун уларни тушунмаганини маълум қилди.
Изоҳ (0)