Yevrokomissiya o‘rta va og‘ir yuk mashinalari ishlab chiqaruvchi besh kompaniyani Yevropa raqobat me’yorlarini buzganliklari uchun Yevroittifoq tarixidagi eng yirik jarimaga tortdi. Raqobat bo‘yicha yevrokomissar Margrete Vestagerning ma’lum qilishicha, jarima miqdori 3 milliard yevroga teng. Bu haqda “TASS” xabar bermoqda.
Jarimaga tortilgan kompaniyalar — MAN (Volkswagen’ga tegishli), Daimler, Volvo/Renault konserni, shuningdek, Gollandiyaning DAF hamda Italiyaning Iveco kompaniyalari.
“Jarima miqdorining bu qadar kattaligi kartel juda ko‘p vaqtdan buyon faoliyat yuritib kelayotgani bilan tushuntiriladi. U 1997-yilda kompaniya rahbarlarining Bryusseldagi yig‘ilishida tashkil etilgan. Keyingi yillarda kompaniya rahbariyati vakillari muntazam ravishda uchrashib turgan, ular narx siyosatini, raqobat qonunchiligi buzilishini yashirish uslublarini muvofiqlashtirgan, o‘z modellarida yangi texnologiyalar joriy etishni sinxronlashtirib borgan”, — ma’lum qildi Vestager xonim.
Yana bir yuk mashinalari ishlab chiqaruvchisi — Scania kompaniyasining ishi ko‘rib chiqilmoqda, u hali jarimaga tortilmadi.
Izoh (0)