Apple Дональд Трамп туфайли республикачилар съездини молиялаштиришдан бош тортди

Apple Дональд Трамп туфайли июлда Кливленда бўлиб ўтадиган ва АҚШ президентлигига номзод илгари суриладиган республикачилар съездини молиялаштиришдан бош тортди. Бу ҳақда «РБК» хабар бермоқда.

Компания аввал кўрсатиб келган қўллаб-қувватлашдан воз кечишига миллиардернинг аёллар, муҳожирлар ва озчилик тоифа ҳақидаги баҳсли фикрлари сабаб бўлди. Бундан ташқари, Трамп ўз вақтида қурилмаларидаги маълумотларни ошкор этишни истамагани учун Тим Кукни танқид қилган ва Apple маҳсулотларини харид қилмасликка чақирганди.

Бошқа технологик компаниялар —Facebook, Google, Microsoft республикачилар съездига ёрдам кўрсатишда давом этади. Apple Филадельфияда ёзда бўлиб ўтадиган демократлар съездини молиялаштиришда иштирок этиш-этмаслиги ҳозирча номаълум бўлиб турибди.