Европага бориш истагида бўлган 450 муҳожир ҳар ой Ўрта Ер денгизида ҳалок бўлмоқда. Бу ҳақда 18 июнь, шанба куни Грециянинг Лесбос оролидаги қочқинлар лагерига ташриф буюрган БМТ бош котиби Пан Ги Мун маълум қилди, деб хабар беради «ТАСС».
«Ҳар куни бутун дунё бўйлаб минглаб оила уйларини тарк этмоқда. Ҳар ойда Ўрта Ер денгизида 450 киши ҳалок бўлмоқда. Бу иккита қитъалараро йўловчи самолёти бортидагилар сонига тенг», — таъкидлади бош котиб.
Лесбосга боришдан аввал Пан Ги Мун Афинада мамлакат бош вазири Алексис Ципрас билан учрашди ва Грецияни қочқин ҳамда муҳожирларга кўрсатаётган кўмак учун мақтади.
«Ўзидаги иқтисодий қийинчиликларга қарамай, Греция кишилар ҳаётини қутқариб, бағрикенглигини намойиш этмоқда. Бироқ мамлакат халқаро ҳамжамият кўмагига муҳтож. Греция бу муаммо қаршисида бир ўзи қолишига йўл қўймаслик зарур», — маълум қилди Пан Ги Мун.
Изоҳ (0)