Америка Кубоги–2016. Аргентина Венесуэлани, Чили Мексикани йирик ҳисобда мағлубиятга учратиб, ярим финалга чиқди (видео)

АҚШ мезбонлик қилаётган футбол бўйича Америка Кубоги–2016 турнирининг чорак финал учрашувлари ўз якунига етди.

Турнир фаворитларидан бири Аргентина терма жамоаси ушбу босқичда мусобақа сенсациясига айланган Венесуэлага қарши баҳс олиб борди. Катта тажрибага эга бўлган Херардо Мартино жамоаси 4:1 ҳисобида зафар қучди.

Ўйиннинг 8 ва 28-дақиқаларида Гонсало Игуаин рақиб дарвозасини аниқ нишонга олган бўлса, 60-дақиқада Лионель Месси ҳисобни йирик кўринишга олиб келди. 70-дақиқада Саломон Рондон ҳисобни қисқартиришга эришди, бироқ 1 дақиқадан сўнг Эрик Ламела яна гол киритиб, ҳисобнинг йирик бўлиб қолишини таъминлади.

Шундай қилиб, Аргентина мусобақанинг ярим финалига чиқди. Херардо Мартино шогирдлари кейинги босқичда АҚШ футболчилари билан баҳс олиб боради.

Чорак финалнинг сўнгги ўйинида Мексика терма жамоаси кутилмаганда Чилига ўта йирик ҳисобда имкониятни бой берди. Эдуардо Варгаснинг покери, Эдсон Пучнинг дубли ва Алексис Санчеснинг голи Чилининг 7:0 ҳисобидаги ғалабасини таъминлади.

Чили ярим финалда Колумбия терма жамоаси билан финал йўлланмаси учун куч синашади.

Америка Кубоги—201619 июнь, якшанбаЧорак финал беллашувлари

Аргентина – Венесуэла 4:1 (2:0, 2:1)

Мексика – Чили 0:7 (0:2, 0:5)

• Америка Кубоги–2016. АҚШ терма жамоаси Эквадорни мағлубиятга учратиб, ярим финалга йўл олди

• Америка Кубоги–2016. Колумбия пенальтилар сериясида Перуни таслим қилиб, ярим финалга чиқди