Қозоғистоннинг Ақтўбе вилояти маъмурияти Ақтўбедаги терактда қурбон бўлганларнинг оилаларига бериладиган ёрдам пулини ошириш ҳақида қарор қабул қилди. Бу ҳақда «ТАСС» хабар бермоқда.
«5 миллион тенгедан (15 минг доллар) ажратилади», — дейилади Ақтўбе Ахборот маркази томонидан 9 июнь, пайшанба куни тарқатилган хабарда. Аввалроқ 1 миллион тенге ажратиш ҳақида сўз юритилган эди.
Куни кеча мамлакат президенти Нурсултон Назарбоев Ақтўбеда юз берган ҳодиса муносабати билан қозоғистонликларга мурожаатида унинг топшириғи билан Ички ишлар вазирлиги ва ҳокимиятлар қурбон бўлган ва жабрланганларнинг оилаларига ҳар томонлама ёрдам кўрсатаётганлигини маълум қилди.
Эслатиб ўтамиз, 5 июнь куни номаълум шахслар Қозоғистоннинг Ақтўбе шаҳрида жойлашган бир қанча қурол дўконларини талон қилди, шундан сўнг полиция билан тўқнаш келганлиги ҳақида хабар берилган эди. Оқибатда етти киши, жумладан, уч нафар ҳарбий ҳалок бўлди.
ИИВнинг охирги маълумотларига кўра, аксилтеррорчилик операцияларини ўтказиш чоғида 13 нафар жиноятчи йўқ қилинган, тўрт нафари яраланган, олти нафари қидирувда.
Бугун, 9 июнь куни республикада теракт қурбонлари хотирасига миллий мотам куни бўлиб ўтмоқда.
Изоҳ (0)