Qozog‘istonning Aqto‘be viloyati ma’muriyati Aqto‘bedagi teraktda qurbon bo‘lganlarning oilalariga beriladigan yordam pulini oshirish haqida qaror qabul qildi. Bu haqda “TASS” xabar bermoqda.
“5 million tengedan (15 ming dollar) ajratiladi”, — deyiladi Aqto‘be Axborot markazi tomonidan 9-iyun, payshanba kuni tarqatilgan xabarda. Avvalroq 1 million tenge ajratish haqida so‘z yuritilgan edi.
Kuni kecha mamlakat prezidenti Nursulton Nazarboyev Aqto‘beda yuz bergan hodisa munosabati bilan qozog‘istonliklarga murojaatida uning topshirig‘i bilan Ichki ishlar vazirligi va hokimiyatlar qurbon bo‘lgan va jabrlanganlarning oilalariga har tomonlama yordam ko‘rsatayotganligini ma’lum qildi.
Eslatib o‘tamiz, 5-iyun kuni noma’lum shaxslar Qozog‘istonning Aqto‘be shahrida joylashgan bir qancha qurol do‘konlarini talon qildi, shundan so‘ng politsiya bilan to‘qnash kelganligi haqida xabar berilgan edi. Oqibatda yetti kishi, jumladan, uch nafar harbiy halok bo‘ldi.
IIVning oxirgi ma’lumotlariga ko‘ra, aksilterrorchilik operatsiyalarini o‘tkazish chog‘ida 13 nafar jinoyatchi yo‘q qilingan, to‘rt nafari yaralangan, olti nafari qidiruvda.
Bugun, 9-iyun kuni respublikada terakt qurbonlari xotirasiga milliy motam kuni bo‘lib o‘tmoqda.
Izoh (0)