Uber такси-сервиси Ford Fusion гибрид седани базасида яратилган, автоном бошқарув функцияларига эга тажриба нусхаси бўлган автомобилнинг илк расмий суратини эълон қилди. Ҳайдовчисиз автомобиль синови Питтсбург шаҳри (АҚШ, Пенсильвания штати) йўлларида бошланди, дея хабар беради Motor.
Uber UTC радарлар ва лазер сканерларини ўз ичига олган қурилмалар тўплами билан жиҳозланган. Шунингдек, ҳудуд ва инфратузилманинг батафсил харитасини тузишда ёрдам берадиган энг замонавий камераларга эга. Сенсорлар бирданига йўлга чиқиб келган машиналар, эътиборсиз йўловчилар, ҳатто йўлни кесиб ўтаётган ғозларни ҳам пайқашга қодир.
Автомобиль ҳаракатланиш, тезликни ошириш, тўхташ, руль ғилдирагини назорат қилиш ва бошқа қатор асосий функцияларни мустақил бажаришга қодир. Бироқ «автопилот» фаол ҳолатда бўлганда ҳам, ҳайдовчилик ўриндиғида доимий равишда исталган пайт бошқарувни ўзига олиши мумкин бўлган синовчи ўтиради.
Автоном бошқарув тизимларини ишлаб чиқиш Uber’нинг Питтсбургда жойлашган янги илмий-техник марказида олиб борилмоқда. Компания вакилларининг билдиришича, турли кўринишдаги кўчалари, йўл ҳаракатини ташкиллашнинг кўплаб вариантлари ва об-ҳаво шароитининг турли-туманлиги туфайли мазкур шаҳар ҳайдовчисиз автомобиллар синови учун жуда қулай.
Изоҳ (0)