Uber taksi-servisi Ford Fusion gibrid sedani bazasida yaratilgan, avtonom boshqaruv funksiyalariga ega tajriba nusxasi bo‘lgan avtomobilning ilk rasmiy suratini e’lon qildi. Haydovchisiz avtomobil sinovi Pittsburg shahri (AQSh, Pensilvaniya shtati) yo‘llarida boshlandi, deya xabar beradi Motor.
Uber UTC radarlar va lazer skanerlarini o‘z ichiga olgan qurilmalar to‘plami bilan jihozlangan. Shuningdek, hudud va infratuzilmaning batafsil xaritasini tuzishda yordam beradigan eng zamonaviy kameralarga ega. Sensorlar birdaniga yo‘lga chiqib kelgan mashinalar, e’tiborsiz yo‘lovchilar, hatto yo‘lni kesib o‘tayotgan g‘ozlarni ham payqashga qodir.
Avtomobil harakatlanish, tezlikni oshirish, to‘xtash, rul g‘ildiragini nazorat qilish va boshqa qator asosiy funksiyalarni mustaqil bajarishga qodir. Biroq “avtopilot” faol holatda bo‘lganda ham, haydovchilik o‘rindig‘ida doimiy ravishda istalgan payt boshqaruvni o‘ziga olishi mumkin bo‘lgan sinovchi o‘tiradi.
Avtonom boshqaruv tizimlarini ishlab chiqish Uber’ning Pittsburgda joylashgan yangi ilmiy-texnik markazida olib borilmoqda. Kompaniya vakillarining bildirishicha, turli ko‘rinishdagi ko‘chalari, yo‘l harakatini tashkillashning ko‘plab variantlari va ob-havo sharoitining turli-tumanligi tufayli mazkur shahar haydovchisiz avtomobillar sinovi uchun juda qulay.
Izoh (0)