Тошкентда йўл ёқасида беўхшов қолдирилган Lacetti сабаб Volvo русумли ўт ўчириш машинаси ҳаракатни давом эттира олмади. Бу ҳақда 20 май, жума куни Facebook’даги «Водители Ташкента» гуруҳида фотохабар эълон қилинган.
Қайд этишларича, ҳодиса 19 май куни юз берган, бироқ айнан қаерда бўлганига аниқлик киритилмаган.
Воқеа жойини таниган фойдаланувчилар бу йўл аслида икки томонлама ҳаракат учун мўлжаллангани, йўл ёқасида машина қолдириш тақиқлангани, кўча бошига тегишли тақиқловчи белги ўрнатилганини маълум қилган.
Бир гуруҳ фойдаланувчилар шошилинч хизматларнинг фаолиятига халал берган мана шундай автомобилларнинг ҳайдовчиларига нисбатан катта жарима чораларини татбиқ этишни таклиф қилган.
Маълумот учун, Маъмурий жавобгарлик тўғрисидаги кодекснинг 128-6-моддасига мувофиқ, транспорт воситалари ҳайдовчиларининг тўхташ ва тўхтаб туриш қоидаларини бузиши энг кам иш ҳақининг уч баравари (20 май ҳолатига кўра — 390 720 сўм)дан ўн баравари (1 953 600 сўм)гача жарима солинишига сабаб бўлади.
Изоҳ (0)