Донбассни жанглар ёрдамида қайтаришнинг иложи йўқ. Украина президенти Пётр Порошенко бу ҳақда мамлакат миллий хавфсизлик ва мудофаа кенгаши йиғилишида маълум қилди, дея хабар беради «Коммерсантъ».
Давлат раҳбарининг билдиришича, Донбассдан қуролли тузилмаларнинг олиб чиқилиши, асирларнинг озод қилиниши, можарони бартараф этишнинг сиёсий асослари, давлат чегаралари устидан назоратнинг ўрнатилиши Украина таяниб келаётган тамойиллардир. Бу чораларга ўтиш даврини таъминлашга кўмак берадиган ЕХҲТ махсус полиция миссияси киритилиши ҳам ёрдам беради.
«Нимани рўкач қилишларидан қатъи назар, тинчлик жараёнини бузишга бўлган ҳаракатлар давлатга нисбатан масъулиятсизлик, бу фақат Донецк ҳамда Луганск вилоятлари бир қисми оккупация остида қолишига олиб келади. Бунга эса олий бош қўмондон ва президент сифатида йўл қўя олмайман», — дея таъкидлаган Порошенко.
20 май, жума куни Киевда, Олий Рада деворлари олдида Донбассдаги аксилтеррор операцияларида иштирок этган жангари кайфиятдаги «Азов» баталёни аъзоларининг оммавий норозилик намойиши бўлиб ўтган. Турли манбаларга кўра, намойишда 3 мингдан 10 минггача бўлган киши қатнашган.
Изоҳ (0)