AQShlik olimlar o‘z tajribasi chog‘ida OIVni yengishga muvaffaq bo‘ldi

Templ universitetining Kamel Xaliliy rahbarligidagi bir guruh molekulyar biologlari CRISPR/Cas9 genlarni tahrirlash texnologiyasi yordamida birinchi marta tirik jonivorlar genomidan OIV (Odam immuntanqisligi virusi)ga oid DNK segmentini olib tashlashga muvaffaq bo‘ldi. Ish natijalari Gene Therapy jurnalida chop qilindi. Press-reliz universitet saytiga joylandi.

Olimlar avvalgi tadqiqotlarida CRISPR/Cas9 tizimi xo‘jayin hujayra genomidagi virus genini, salbiy oqibatlarsiz, olib tashlashga qodirligini ko‘rsatib bera olgan edi. Ammo bu usul tirik organizmda ish berish-bermasligi noma’lum edi.

So‘nggi tajribasida olimlar genni tahrirlash texnologiyasi har bir organining har bitta hujayrasiga virus genlari kiritilgan transgen sichqon va kalamushlar organizmidan OIVni bartaraf qila olishini tekshirib ko‘rdi. Virus genlarini o‘chirish uchun modifikatsiyalangan CRISPR tizimini hayvonlarga kiritish uchun adenovirus vektoridan foydalandi, u zarur nukleotid izchillikka, shuningdek, Cas oqsili genlariga ega molekuladir.

Ikki haftadan so‘ng tadqiqotchilar jonivorlar genomlarini tahlil qilib ko‘rdi. OIV segmenti har bitta to‘qimadagi DNKdan olib tashlangan edi. Virusli RNK (ribonuklein kislotasi) tahlili uning miqdori limfotsitlar hujayralarida, shuningdek, limfa tugunlarida keskin kamayib ketganini ko‘rsatdi.