The Economist Россияни «таниш-билишчилик капитализми» етакчиси деб топди

The Economist журнали тузиб чиққан «таниш-билишчилик капитализми» рейтингида Россия биринчи ўринга қўйилди. Бу ҳақда Meduza хабар бермоқда.

«Таниш-билишчилик капитализми» деганда бизнес ривожи тадбиркорнинг давлат структураларидаги таниш-билишларига боғлиқ бўладиган иқтисодий тузум тушунилади.

Индекс Forbes’нинг энг бой инсонлар рўйхатига асосланган. The Economist давлатга қўшилиб кетиш хавфи энг юқори бўлган ўн соҳани ажратиб кўрсатади — нефть-газ, мудофаа, ўйин бизнеси ва ҳоказо. Шундан сўнг бизнесменлар мамлакатлар бўйича гуруҳланади, уларнинг умумий даромади мамлакат ЯИМига фоизларда таққосланади.

Бу кўрсаткич Россияда ЯИМнинг 18 фоизига тенг бўлиб чиқди. «Кучли» бешликка, шунингдек, Малайзия, Филиппин, Сингапур ва Украина кирди.

«Таниш-билишчилик капитализми» энг кам ривожланган мамлакат деб Германия тан олинди (0,2 фоиз). Ундан кейинги поғоналарни Польша, Жанубий Корея, Япония ва Франция эгаллади.

Рейтингда жами 22 мамлакат иштирок этди: жаҳоннинг беш энг йирик иқтисодиёти, тадбиркорларнинг даромадлари ҳақидаги маълумотлар шаффоф бўлган ўнта кучли иқтисодиёт ва ўнта «муаммоли» давлат.