Москвалик эркак бувисининг шеъри рекламада ишлатилгани учун McDonald’s’дан 200 минг рубль ундириб олди

Москванинг Тверь тумани суди McDonald’s ресторанлар тармоғидан москвалик Иван Сергеев фойдасига 200 минг рубль ундирди, дея хабар бермоқда «Интерфакс». У рекламада ўз бувиси, шоира Аделина Адалис шеърларидан фойдаланганлик учун 5 миллион рубль товон пули талаб қилган эди.

Даъвога кўра, Сергеев McDonald’s компаниясига рекламада бувисининг шеърларини ишлатиш ҳуқуқини бермаган. Реклама роликларини намойиш қилган телеканаллар ҳам даъво бўйича жавобгар деб кўрсатилган эди.

Телеканаллар вакиллари ролик бошқа кўрсатилмаётганини маълум қилди. Даъвогарнинг вакили эса реклама ролиги интернетда намойиш қилинишда давом этаётганини айтди.

Аделина Адалис — россиялик шоира, ёзувчи ва таржимон. Унинг ўғли — қўшиқчи шоир Владимир Сергеев.