Футбол бўйича Қатар Юлдузлар Лигасида 2015—2016 йилги мавсум якунланди, деб хабар берди «Championat.asia». Унга кўра ўзбекистонлик футболчи Сардор Рашидов тўп сураётган «Ал-Жаиш» клуби кумуш медаль соҳибига айланди.
«Ал-Жаиш» сўнгги турда «Ас-Садд» меҳмони бўлиб, 2:2 ҳисобида дуранг ўйнади. Мавсум якунига кўра «Ал-Жаиш» 48, «Ас-Садд» эса 47 очко жамғарди. Қатар чемпионлигини қўлга киритган «Ар-Райян» 62 очко тўплашга эришди.
Кумуш медаль масаласи ҳал этилган сўнгги турда Сардор Рашидов майдонга тушмади. «Ас-Садд»нинг испаниялик легионери Хави эса учрашувни тўлиқ ўтказди.
Сардор Рашидов «Ал-Жаиш» сафида жорий мавсум 23 та ўйинда иштирок этиб, 9 та гол уришга эришди. Маълумот учун, Рашидов 2015 йилнинг ёзида «Бунёдкор»дан «Ал-Жаиш» сафига 2 100 000 АҚШ доллари эвазига ўтиб, 3 йиллик шартномага имзо чеккан, кейинчалик эса Қатар орқали Европага кетиш ниятида эканини маълум қилганди.
Қатарга қадар Европада — Испаниянинг «Барселона» клуби сафида тўп сурган Хави «Ас-Садд» сафида 24 та ўйинда майдонга тушиб, 3 та гол урди.
Қатар Юлдузлар Лигасида тўп сурадиган яна бир ўзбекистонлик футболчи Санжар Турсунов ўз жамоаси «Умм Салал» билан 5-ўринни қўлга киритди. Турсунов жамоаси билан 11 та ўйинда иштирок этган.
Изоҳ (0)