Futbol bo‘yicha Qatar Yulduzlar Ligasida 2015—2016-yilgi mavsum yakunlandi, deb xabar berdi “Championat.asia”. Unga ko‘ra o‘zbekistonlik futbolchi Sardor Rashidov to‘p surayotgan “Al-Jaish” klubi kumush medal sohibiga aylandi.
“Al-Jaish” so‘nggi turda “As-Sadd” mehmoni bo‘lib, 2:2 hisobida durang o‘ynadi. Mavsum yakuniga ko‘ra “Al-Jaish” 48, “As-Sadd” esa 47 ochko jamg‘ardi. Qatar chempionligini qo‘lga kiritgan “Ar-Rayyan” 62 ochko to‘plashga erishdi.
Kumush medal masalasi hal etilgan so‘nggi turda Sardor Rashidov maydonga tushmadi. “As-Sadd”ning ispaniyalik legioneri Xavi esa uchrashuvni to‘liq o‘tkazdi.
Sardor Rashidov “Al-Jaish” safida joriy mavsum 23 ta o‘yinda ishtirok etib, 9 ta gol urishga erishdi. Ma’lumot uchun, Rashidov 2015-yilning yozida “Bunyodkor”dan “Al-Jaish” safiga 2 100 000 AQSh dollari evaziga o‘tib, 3 yillik shartnomaga imzo chekkan, keyinchalik esa Qatar orqali Yevropaga ketish niyatida ekanini ma’lum qilgandi.
Qatarga qadar Yevropada — Ispaniyaning “Barselona” klubi safida to‘p surgan Xavi “As-Sadd” safida 24 ta o‘yinda maydonga tushib, 3 ta gol urdi.
Qatar Yulduzlar Ligasida to‘p suradigan yana bir o‘zbekistonlik futbolchi Sanjar Tursunov o‘z jamoasi “Umm Salal” bilan 5-o‘rinni qo‘lga kiritdi. Tursunov jamoasi bilan 11 ta o‘yinda ishtirok etgan.
Izoh (0)