Саудия Арабистони расмийлари, АҚШ Конгресси 2001 йил 11 сентябридаги терактларга алоқадорликда айблаб, мамлакат ҳукуматини судга тортишга рухсат берувчи лойиҳани маъқуллагудек бўлса, 750 миллиард долларлик АҚШ активларини сотиб юбориш билан таҳдид қилди. Бу ҳақда The New York Times нашри маълум қилди, деб хабар берди Forbes.
Саудия ташқи ишлар вазири Одил ал-Жубайр бу ҳақда Вашингтонга март ойида қилган ташрифи чоғида огоҳлантирган эди. У ўшанда мамлакати АҚШ судлари томонидан музлатиб қўйилиши хавфи туғилган тақдирда қиймати тахминан 750 миллиард доллар бўлган қимматли қоғозлар ва бошқа активларни сотишга мажбур бўлишини билдирганди.
The New York Times манбаларига кўра, АҚШ президенти маъмурияти Конгресс аъзолари билан музокаралар ўтказган ва мамлакатга дипломатик ҳамда иқтисодий хавф туғдириши туфайли қонун лойиҳасини бекор қилишга кўндиришга уринган.
Изоҳ (0)