Хоккей бўйича Россия ўсмирлар терма жамоаси бош мураббийи Виталий Прохоров АҚШда 14—24 апрель кунлари ўтказиладиган ўсмирлар ўртасидаги хоккей бўйича жаҳон чемпионатига борадиган жамоа таркиби ўзгартирилишини маълум қилди. Мусобақага жамоани бошқа мураббий олиб боради, дея хабар беради «Газета.ru» .

АҚШга жўнашдан бир кун аввал терма жамоа таркибининг тўлиқ алмаштирилиши ўйинчиларнинг допинг таҳлилида мельдоний препарати аниқлангани билан боғлиқ бўлиши мумкин. Вазият билан хабардор манбанинг маълум қилишича, ўсмирлар терма жамоасининг бир қатор аъзоларининг допинг таҳлилларида 2016 йил 1 январидан эътиборан тақиқланган препаратлар рўйхатига киритилган мельдоний излари топилган.