Тошкентнинг «Локомотив» футбол клуби эртага, 6 апрель куни Осиё Чемпионлар Лигаси «А» гуруҳи 4-турида Эроннинг «Фулад Сепаҳон» жамоасига қарши ўз майдонида баҳс олиб боради. Учрашувдан олдин ўтказилган матбуот анжуманида эронликлар бош мураббийи Игорь Штимач ва жамоа аъзоси Ҳуссайин Фазели иштирок этди, деб хабар беради «Championat.asia».
- Ажойиб меҳмондорчилик учун «Локомотив»га миннатдорчилик билдираман. Эртага об-ҳаво ўтган ўйиндагидан яхшироқ бўлишидан хурсандман. Бундай шароитда иккала жамоа ҳам ўзининг энг яхши ўйинини намойиш этади. Биз Тошкентга очколар олиш учун келганмиз. Ғалаба учун бор кучимиз билан ўйнаймиз. Ўйинни ютиш осон бўлмайди. Лекин биз учрашувга жуда яхши тайёргарлик кўрдик, шу боис ўз кучимизга ишонамиз. Эртага ғалаба қозонишга ишончим юқори, – дейди Игорь Штимач.
- Учрашувга тайёргарлик босқичини яхши ўтадик. Бу ерга ғалаба учун келганмиз. Шунинг учун, мураббийимиз айтганидек, бор кучимизни ишга солиб, уч очко олишни кўзлаяпмиз, – дейди Ҳуссайин Фазели.
Шундан сўнг «Фулад Сепаҳон» устози Игорь Штимач журналистларнинг бир қатор саволларига жавоб қайтарди.
- «Локомотив»га қарши ўтган ўйиндаги мағлубиятга фақат об-ҳаво сабаб бўлдими?
- Албатта, об-ҳаво мағлубиятнинг ягона сабаби эмас эди. «Локомотив» қарши ҳужумда ўйнагани учун уларга ёмғир қўл келди. Лекин ўзимиз ҳам қўпол хатоларга йўл қўйдик.
- Жамоада йўқотишлар борми?
- Бир нечта жароҳат олган футболчилар бор. Улар даволанди. Расмий машғулотдан сўнг эртага ким майдонга тушишини ҳал қиламиз.
- «Фулад Сепаҳон» Эроннинг амалдаги чемпиони ҳисобланади. Лекин бу мавсум ички чемпионатда ҳам, ОЧЛ турнирида ҳам жамоанинг ишлари юришмаяпти.
- Жамоа янгидан қурилмоқда, молиявий томондан ўзгаришлар бўлди. Трансфер ойнаси вақтида кучли футболчиларни ўз сафимизга қўша олмадик. Шунинг учун, ёш футболчиларга кўпроқ эътибор қаратишга қарор қилдик. Чўққига чиқиш, у ерда қолишдан кўра осонроқ. Ҳозир амалга ошираётган ишимиз келаси 5 йилда чемпионатда кучли клуб тузишга қаратилган.
- Эртага жамоангиз сафарда ўйнайди. Шундан келиб чиқиб, сизларни қарши ҳужумда ўйнайди дейишимиз мумкинми?
- Ҳозир тактикамни сизга айтиб бера олмайман (кулади). Бор кучимизни ҳужумга қаратишга сабаб кўрмаяпман. Сабаби, бу охирги ўйин эмас. Олдимизда яна ўйинлар бор.
- «Локомотив» жамоаси ҳақида нима дея оласиз?
Ҳуссайин Фазели: «Локомотив» жисмоний жиҳатдан кучли экани ўтган ўйинда сезилди. Ўша баҳсдаги ноқулай об-ҳаво ўз ўйинимизни кўрсатишга имкон бермади. Эртага ҳаво яхши бўлади. Шу боис, айнан эртага «Фулад Сепаҳон» ўзнинг кучли ўйинини кўрсатади.
«Локомотив» — «Фулад Сепаҳон» учрашуви эртага, 6 апрель куни Тошкентдаги «Локомотив» стадионида соат 16:00 да бошланади.
Эслатиб ўтамиз, ушбу жамоалар ўртасидаги Эронда бўлиб ўтган баҳсда «Локомотив» 2:0 ҳисобида ғалаба қозонган эди. ОЧЛ «А» гуруҳи 3-туридан сўнг «Локомотив» 5 очко билан иккинчи, «Фулад Сепаҳон» эса 3 очко билан учинчи поғонани эгаллаб турибди.
Изоҳ (0)