Toshkentning “Lokomotiv” futbol klubi ertaga, 6-aprel kuni Osiyo Chempionlar Ligasi “A” guruhi 4-turida Eronning “Fulad Sepahon” jamoasiga qarshi o‘z maydonida bahs olib boradi. Uchrashuvdan oldin o‘tkazilgan matbuot anjumanida eronliklar bosh murabbiyi Igor Shtimach va jamoa a’zosi Hussayin Fazeli ishtirok etdi, deb xabar beradi “Championat.asia”.
- Ajoyib mehmondorchilik uchun “Lokomotiv”ga minnatdorchilik bildiraman. Ertaga ob-havo o‘tgan o‘yindagidan yaxshiroq bo‘lishidan xursandman. Bunday sharoitda ikkala jamoa ham o‘zining eng yaxshi o‘yinini namoyish etadi. Biz Toshkentga ochkolar olish uchun kelganmiz. G‘alaba uchun bor kuchimiz bilan o‘ynaymiz. O‘yinni yutish oson bo‘lmaydi. Lekin biz uchrashuvga juda yaxshi tayyorgarlik ko‘rdik, shu bois o‘z kuchimizga ishonamiz. Ertaga g‘alaba qozonishga ishonchim yuqori, – deydi Igor Shtimach.
- Uchrashuvga tayyorgarlik bosqichini yaxshi o‘tadik. Bu yerga g‘alaba uchun kelganmiz. Shuning uchun, murabbiyimiz aytganidek, bor kuchimizni ishga solib, uch ochko olishni ko‘zlayapmiz, – deydi Hussayin Fazeli.
Shundan so‘ng “Fulad Sepahon” ustozi Igor Shtimach jurnalistlarning bir qator savollariga javob qaytardi.
- “Lokomotiv”ga qarshi o‘tgan o‘yindagi mag‘lubiyatga faqat ob-havo sabab bo‘ldimi?
- Albatta, ob-havo mag‘lubiyatning yagona sababi emas edi. “Lokomotiv” qarshi hujumda o‘ynagani uchun ularga yomg‘ir qo‘l keldi. Lekin o‘zimiz ham qo‘pol xatolarga yo‘l qo‘ydik.
- Jamoada yo‘qotishlar bormi?
- Bir nechta jarohat olgan futbolchilar bor. Ular davolandi. Rasmiy mashg‘ulotdan so‘ng ertaga kim maydonga tushishini hal qilamiz.
- “Fulad Sepahon” Eronning amaldagi chempioni hisoblanadi. Lekin bu mavsum ichki chempionatda ham, OChL turnirida ham jamoaning ishlari yurishmayapti.
- Jamoa yangidan qurilmoqda, moliyaviy tomondan o‘zgarishlar bo‘ldi. Transfer oynasi vaqtida kuchli futbolchilarni o‘z safimizga qo‘sha olmadik. Shuning uchun, yosh futbolchilarga ko‘proq e’tibor qaratishga qaror qildik. Cho‘qqiga chiqish, u yerda qolishdan ko‘ra osonroq. Hozir amalga oshirayotgan ishimiz kelasi 5 yilda chempionatda kuchli klub tuzishga qaratilgan.
- Ertaga jamoangiz safarda o‘ynaydi. Shundan kelib chiqib, sizlarni qarshi hujumda o‘ynaydi deyishimiz mumkinmi?
- Hozir taktikamni sizga aytib bera olmayman (kuladi). Bor kuchimizni hujumga qaratishga sabab ko‘rmayapman. Sababi, bu oxirgi o‘yin emas. Oldimizda yana o‘yinlar bor.
- “Lokomotiv” jamoasi haqida nima deya olasiz?
Hussayin Fazeli: “Lokomotiv” jismoniy jihatdan kuchli ekani o‘tgan o‘yinda sezildi. O‘sha bahsdagi noqulay ob-havo o‘z o‘yinimizni ko‘rsatishga imkon bermadi. Ertaga havo yaxshi bo‘ladi. Shu bois, aynan ertaga “Fulad Sepahon” o‘zning kuchli o‘yinini ko‘rsatadi.
“Lokomotiv” — “Fulad Sepahon” uchrashuvi ertaga, 6-aprel kuni Toshkentdagi “Lokomotiv” stadionida soat 16:00 da boshlanadi.
Eslatib o‘tamiz, ushbu jamoalar o‘rtasidagi Eronda bo‘lib o‘tgan bahsda “Lokomotiv” 2:0 hisobida g‘alaba qozongan edi. OChL “A” guruhi 3-turidan so‘ng “Lokomotiv” 5 ochko bilan ikkinchi, “Fulad Sepahon” esa 3 ochko bilan uchinchi pog‘onani egallab turibdi.