1986 йили «Челленжер» кўп бор фойдаланиладиган коинот кемаси ҳалокати ҳақида огоҳлантирган NASA собиқ муҳандиси Боб Эбелинг 90 ёшида вафот этди. Бу ҳақда «Интерфакс» хабар бермоқда.
Ўшанда Эбелинг NASA ракеталари учун тезлатгичлар етказиб берган Morton Thiokol компаниясида ишларди. У ва бир неча ҳамкасблари ҳукм сураётган фавқулодда совуқ ҳаво қаттиқ ёқилғили тезлатгич резина ҳалқаларини шикастлаши ва бу ёқилғи сизишига олиб келиши мумкинлигидан ташвишга тушган. Эбелинг ўз хавотирларини парвоздан бир кун олдин раҳбариятга етказган ва уларни миссияни қолдиришга кўндириш учун бир неча соат уринганди.
Ўзи билан бирга ишлаган қизининг айтишича, ўша куни отаси ниҳоятда тушкун ҳолатда бўлган. У тўппонча олиб келиб, раҳбариятни асирликка олгандагина парвозни бекор қилиши мумкинлигини маълум қилганди.
NASA’да 20 йилга яқин меҳнат қилган Эбелинг экипажининг барча етти нафар аъзоси ҳалок бўлган «Челленжер» фожиаси (1986 йил 28 январь)дан бир неча ой ўтиб, ишдан бўшаб кетганди.
Изоҳ (0)