Олимлар: Ер атмосферасидаги кислород аввал тахмин этилганидан 800 млн йил олдинроқ пайдо бўлган

Эркин кислород Ер атмосферасида 3,8 миллиард йил олдинданоқ мавжуд бўлган, бу баъзи тадқиқотчилар тахмин қилган вақтдан 800 миллион йил аввалроқдир, деб ёзади «ТАСС». Бундай хулосага Копенгаген университети профессори Роберт Фрай раҳбарлигидаги олимлар гуруҳи келди.

Фрай сайёрадаги энг қадимий тоғ жинслари — Гренландия ғарбидаги 3,7—3,8 миллиард йиллик йўл-йўл темир рудаси формацияларини изотоп таҳлилдан ўтказди. Натижада унда учрайдиган уран ва айниқса хром изотоплари турлари ушбу металлар ўша вақтдаёқ оксидланишга учрагани аниқланди, бу атмосферада, эҳтимол жуда кам миқдорда, кислород мавжуд бўлгани билан изоҳланади.

Айни пайтда Фрай Гренландиядаги Исуа формацияларида чўкинди жинсларидаги олтингугурт ва фосфор изотопларини ўрганмоқда. Бу 3,8 миллиард йил аввал атмосферадаги кислород зичлиги қандай бўлганини аниқлаш имконини беради. Олим ва унинг ҳамкасблари чиқарадиган хулосалар илм-фаннинг сайёра энди пайдо бўлган вақтлардаги эволюцион жараёнларнинг бориши ҳақидаги тушунчаларига жиддий таъсир ўтказиши мумкин.