Дунёнинг энг бой одами Илон Маск Apple компаниясининг App Store иловасидан норози бўлмоқда. Маск App Store монополияга қарши кураш тўғрисидаги қонунларни бузмоқда, деган фикрда. Бу ҳақда Reuters агентлиги хабар берди.
Миллиардер Илон Маск хAI компаниясига ҳам асос солган. Компания ўзининг Grok номли сунъий интеллект иловасини App Store’га жойлаштирган.
Илон иддаосига кўра, OpenAI билан ҳамкорликка эга Apple ChatGPT’дан бошқа сунъий интеллект компанияларининг иловаларини биринчи ўринга қўймасликка ҳаракат қилмоқда.
“Apple OpenAI’дан бошқа ҳеч бир сунъий интеллект компаниясининг App Store’да 1-ўринга чиқишига йўл қўймасликка уринаётгандек ҳаракат қилмоқда. Бу эса аниқ монополияга қарши қонун бузилишидир. хAI дарҳол ҳуқуқий чоралар кўради”, деган Маск ўзининг Х (Twitter) ижтимоий тармоғидаги постида.
Қайд этилишича, Илон Маск Apple’нинг OpenAI’га ён босаётгани ҳақидаги иддаоларига далил келтирмаган. Apple ва OpenAI бу борадаги саволларга жавоб бермаган.
Айни вақтда ChatGPT App Store’да биринчи рақамли бепул илова бўлиб турибди. хAI’нинг Grok иловаси бешинчи ўринда жойлашган. Googleънинг Gemini чатботи атиги 57-ўринда қайд этилган. ChatGPT Google Play Store’да ҳам энг оммабоп илова бўлиб турибди.
Таъкидланишича, Apple OpenAI билан ҳамкорликка эга бўлиб, ChatGPT’ни iPhone, iPad ва Маc’ларга интеграция қилган.
“Ҳей, Apple App Store! Х дунёдаги биринчи рақамли янгиликлар иловаси ҳисобланади. Grok эса сунъий интеллект дастурлари бўйича 5-ўринда турган бўлса-да, нега уларни ‘Энг зарур иловалар’ бўлимига жойлаштирмайсиз? Сиёсат билан ўйнашяпсизми?”, деган Маск.
Маскнинг бундай баёнотлари Apple’га рақобатни чеклаш борасида норозиликлар кучайиб бораётган бир пайтда янгради. Компанияга АҚШнинг ўзида рақобатни чеклаш доирасида бир қанча ишлар очилган. Шунингдек, Европа Иттифоқининг монополияга қарши кураш бўйича ташкилотлари 2025 йилнинг апрель ойида Apple’ни 587 миллион доллар жаримага тортган эди.
Изоҳ (0)